सरकारद्वारा उद्यमशीलता कोष स्थापना गर्ने


  • Jaynepalnews
  • आइतवार, भदौ १४, २०७७

१४ भदौ, काठमाडौँ । महिला, बालबालिका तथा ज्येष्ठ नागरिक मन्त्री पार्वत गुरुङले ‘सामाजिक उद्यमशीलता कोष’ स्थापना गर्ने सरकारको तयारी रहेको बताएका छन् । बियोन्ड बेइजिङ कमिटी, नेपालले प्रकाशन गरेको ‘एक्सेस टु जस्टिसः सोसियलइन्टर प्राइज इन नेपाल’ नामक अध्ययन प्रतिवेदन सार्वजनिक गर्न आयोजित भर्चुअल कार्यक्रममा उहाँले उक्त कोष स्थापना गर्ने तयारी गरेको बताएका हुन् ।

मन्त्री गुरुङले समाज सेवा तथा मानवीय सेवा गर्ने पवित्र उद्देश्यका साथ खोलिएका सामाजिक सङ्घसंस्थालाई विदेशीदाताको आर्थिक सहायतामा भर पर्नुपर्ने अवस्थाको अन्त्य गर्न पनि समाजकल्याण परिषद्अन्र्तगत सो कोष स्थापना गर्ने तयारी अघि बढाइरहेको स्पष्ट पारे । उनले सामाजिक उद्यमशीलतामैत्री ऐन, कानून तत्काल तर्जुमा गर्ने प्रतिबद्धता व्यक्त गर्दै सामाजिक उद्यमशीलताको अभियानलाई अघि बढाउने गरी ऐनकानून निर्माण गर्नका लागि आवश्यक सुझाव दिन सम्बन्धित सबै पक्षलाई आह्वान गरे ।

“सामाजिक उद्यमशीलताको क्षेत्रमा देखिएका करका समस्या समाधान हुने गरी ऐनकानूनको परिमार्जन गर्नुपर्ने आवश्यक्ता देखिएको छ”, मन्त्री गुरुङले भने, “त्यसका लागि आवश्यक सुझाव दिन म समाजकल्याणका क्षेत्रका कार्यरत सङ्घसंस्था, गैरसरकारी क्षेत्रमा कार्यरत सङ्घसंस्था तथा नागरिक समाजका अगुवाहरुलाई आह्वान गर्दछु ।”

मन्त्री गुरुङले सामाजिक उद्यमशीलताका माध्यमबाट ग्रामीण तथा हिमाली क्षेत्रका महिलालाई उद्यमशील बनाउन चालू आर्थिक वर्षदेखि सबै स्थानीय तहमा ‘महिला उद्यमशीलता सहजीकरण केन्द्र’ स्थापना गर्ने सोच अघि बढाइएको पनि स्मरण गराए । उनले समाजमा महिला हत्याहिंसा हुन नदिने गरी महिलालाई आर्थिक रुपमा सबल बनाउन सामाजिक उद्यमशीलताको अभियानले महत्वपूर्ण योगदान पुर्याउने विश्वास समेत व्यक्त गरे ।

मन्त्री गुरुङले महिला उद्यमीले उत्पादन गरेका वस्तुको बजारीकरणका लागि काठमाडौँको भृकुटीमण्डपमा ‘बजार केन्द्र’ स्थापना गर्ने योजना ल्याइएको उल्लेख गर्दै त्यसमा साथ दिन सम्बन्धित सबै पक्षलाई आग्रह गरे ।

गैरसरकारी संस्था महासङ्घ, नेपालका अध्यक्ष जीतराम लामाले सामाजिक उद्यमशीलताको विकासका लागि आवश्यक ऐनकानुनको व्यवस्था गर्न मन्त्री गुरुङको ध्यानाकर्षण गराएका थिए ।

 

प्रतिक्रिया
सम्बन्धित समाचार

© copyright 2020 and all right reserved to jaynepalnews.com | Site By : SobizTrend Technology